“Empeza por ti” a proposta de EMUGA para acadar os  obxectivos da Axenda 2030.

O proxecto “Empeza por ti” liderado por Emisoras Municipais Galegas, EMUGA, co apoio da Deputación da Coruña, botouse a andar. A proposta traballará os Obxectivos de Desenvolvemento Sustentable recollidos na Axenda 2030 a través da programación de programas, pódcasts e “pílulas” radiofónicas que contribuirán á difusión dos ODS entre a poboación, sobre todo entre os máis novos ao propor novos xeitos de facer radio, como o podcast.

A radio local ao servizo da estratexia deseñada para o desenvolvemento deste ODS plantexados por Nacións Unidas no ano 2015 e que o planeta está traballando de xeito global e para que ninguén quede atrás.

O programa especial inaugural do proxecto emitíuse o pasado sábado 19 e contou con entrevistas que amosan proxectos exemplificadores de boas prácticas a nivel local que poden ter un positivo impacto non só nas colectividades que os acollen, senón tamén no conxunto da poboación como espello do que pode facerse a nivel local para traballar a favor da Axenda 2030.

Da man de Antonio Díaz, cociñeiro e propietario do negocio, Autga Autóctonas, que traballa con produtos locais e razas galegas, coñeciamos a experiencia de posta en valor e aproveitamento económico, da produción e difusión das razas de gando e variedades agrícolas autóctonas. Os nosos produtos locais son un valor en alza que compre apoiar e valorizar e que contribúe a fixar poboación e facilitar a posibilidade de que as zonas rurais recuperen o seu atractivo para novos moradores.

O programa para a creación dunha rede veciñal contra as violencias machistas, O Lavadoiro, tivo especial protagonismo no programa. Lucía Ríos e Silvia López, participantes como mulleres facilitadoras neste proxecto, contáronnos como O Lavadoiro, que xurde como unha proposta institucional pero que implica a mulleres e tamén homes para o seu desenvolvemento, está en plena transformación, consolidándose como un recurso imprescindible para a loita contra as violencias contra a muller.

Con este programa inaugural empeza o desenvolvemento do proxecto “Empeza por ti” que será emitido, durante os próximos meses, na programación compartida polas Emisoras Municipais Galegas. 25 emisoras locais que comparten o obxectivo común de contribuír ao desenvolvemento das sociedades nas que están instaladas e ser parte dese Obxectivo de Desenvolvemento Sustentable número 17, Tecer Alianzas para poder acadar os ODS, redes de colaboración sen as que sería imposible o desenvolvemento de calquera proxecto de participación cidadá como o que EMUGA ven de iniciar.

ESTE SÁBADO, PROGRAMA ESPECIAL "EMPEZA POR TI", NAS EMISORAS MUNICIPAIS GALEGAS

Galicia tamén ten que coidar a auga. A crise hídrica afecta á metade da produción de alimentos e ao 8% do PIB mundial, segundo conclue a Comisión Global da Auga. Ainda que na nosa comunidade poida parecer que non falta o líquido elemento, os expertos alertan sobre os problemas de calidade. Será un dos elementos a abordar no programa especial “Empeza por ti”, que Emisoras Municipais Galegas emitirá o vindeiro sábado 19 de outubro coa colaboración da Deputación da Coruña. Faráse fincapé tamén na necesidade de optar por produtos de proximidade e pola economía circular.

O programa, que comezará as 13,00 horas do sábado, poderá sintonizarse no 107.7 da Frecuencia Modulada e na web www.radiofusion.gal. Forma parte do proxecto “Empeza por ti”, producido por EMUGA, para achegar á poboación, sobre todo á máis nova, os contidos da Axenda 2030 e os Obxectivos para o Planeta que Nacións Unidas acordou no ano 2015.

O espazo do sábado terá continuidade nun “pódcast” que tamén se poderá escoitar todos os dias ás nove da mañá a partir do luns dia 19 de outubro.

A Axenda 2030 é unha chamada a acción colectiva e como emisoras de radio asociadas queremos asumir o noso papel como comunicadores e achegar os 17 ODS propostos nesta Axenda global acordada por 193 países.

Compre actuar, porque ningún dos aspectos do comportamento humano é inocuo para o planeta, a produción dos nosos alimentos, os nosos hábitos de consumo, a utilización dos plásticos, o saneamento dos nosos refugallos, o noso comportamento ten consecuencias para o planeta e compre que tomemos conciencia.

E esta será a proposta que abordaremos no programa especial do sábado no que escoitaremos a persoas de recoñecido prestixio e con coñecementos máis que acreditables como o profesor da Universidade de Santiago de Compostela, Xosé Lois Otero e o presidente da Asociación para a Custodia do Bosque Atlántico Betula, Xabier Ribeiro. Tamén se falará no programa de accións sobre a igualdade de xénero e arredor dos produtos de proximidade na gastronomía. Escoitaremos ao arquitecto Iago Lestegás abordando o valor patrimonial dos hórreos como elemento de importancia na paisaxe galega. 

Na imaxe, As Lolas da Cascarilla na Feira da Artesanía de Fene en 2022, agasallos artesáns e de proximidade en San Sadurniño.

Fotografía Xan Xe